Que é a globalización e se debe definirse con ese termo a etapa histórica actual na que se viven procesos de mobilización en contra deste proceso, foi o punto en torno ó que xirou unha desas mesas, que tamén se puido seguir a través da páxina web http://www.h-debate.com,/ e na que actuou como presidente un dos principais e máis críticos economistas políticos do mundo, o norteamericano Andre Gunder Frank, do World History Center de Boston.

      A partir de tres bases, a globalización, a antiglobalización e a historia, os diferentes poñentes consideraron necesario situar a globalización como un proceso que, se ben podería parecer que define o momento actual, é froito de toda unha longa historia dende o XIX ata o XXI.

      Neste sentido, o investigador da Universidade de New Yersey, Elpidio Laguna, considerou necesario renomear a globalización nos termos do coñecido como "americanización ou imperialismo americano'' que definiu como a "unificación do mundo angloparlante nun proceso que comezou hai 3 séculos''.

      Pola contra, para o profesor da Universidade Estadual Paulista de Sao Paulo, José Luis Bizelli, a pregunta fundamental é se "os Estados nacionais son capaces de enfrontarse ás diferencias producidas polo capitalismo e ós conflictos internos.'' "Pode a democracia resistir as políticas de globalización económica?'', preguntouse o investigador brasileño para quen os países de América Latina ven ameazadas as súas democracias pola crise actual do Estado.

O desarraigo e a deshistorización do cidadán local\

O impacto da globalización sobre as especificidades locais ou rexionais foi analizado pola profesora da Universidade 'Simón Rodríguez' de Venezuela, Miriam Meza, como un proceso que provoca "o desarraigo no cidadán común e lesiona as comunidades, deslocalizándoas e deshistorizádoas.'' Ó ver da investigadora brasileña, "o suxeito vive sen espacio histórico e coa súa identidade lesionada, de xeito que tende a actuar segundo patróns estereotipados.''